top of page

My Items

I'm a title. ​Click here to edit me.

Колач со портокал и бадеми

Колач со портокал и бадеми

Едно време опсесија ми беше правењето торти - посебно за специјални моменти како што е Нова Година. Ги правев затоа што ги сметав за уметност - секој може да зготви чорба, ама ретко кој успешно може да состави вкусна торта! За оваа торта додека го добив конечниот вкус, направив 5 варијанти за на крај да направам комбинација од неколку рецепти и да го добијам посакуваниот резултат. Најголемиот предизвик ми беше што сакав да ја печам во мултикукер - не дека не можев во рерна, туку сакав да се испробам и со необичен начин на печење колач, без вклучување рерна. Колач со портокал и бадеми Количина: 16 парчиња Време за подготовка: 70 минути потребен е мултиговач или кружен калап за торта Состојки: 130 g интегрално пченично брашно 120 g сенаменско брашно 100 g кокосов шеќер 60 g мелени потпечени бадеми Кора од 1 портокал 1 лажичка сода ½ лажичка прашок за печиво Ванила екстракт Прстофат сол 80 ml маслиново масло 2 јајца 1 чаша цеден сок од портокал Лажица јаболков оцет За глазура: ¼ чаша (60 ml) сок од протокал 100 g темно чоколадо 2 лажички маслиново масло Кора од портокал Опис: Прво се мешаат сувите состојки, од брашната до солта. Одделно се комбинираат течните соостојки од маслото до оцетот. Се комбинираат сувите и течните состојки, убаво се промешуваат (не премногу) и веднаш се префрлаат во мултиготвач или во намрсен калап за торта. Јас го користев мултиготвачот на Делимано и ја користев опцијата multigrain, која пече на 150 степени, 1 час. На мултиговачите на Филипс има опција cake, па можете таа да ја изберете, само да и го продолжите времето на печење. Во рерна, колачот би се печел на 180 степени, 35-40 минути. Кога ќе се испече колачот, се вари од мултикукерот/калапот за тора и се остава да се излади. Во меѓувреме, се подготвува глазурата и се остава малку да се излади. На основа за торти се поросуваат мелени бадеми и врз нив се поставува колачот. Врз него се прелева глазурата и се остава слободно да се растече низ површината на колачот. може да се украси со дехидрирани или карамелизирани парчиња портокал.

Поповери со спанаќ и праз

Поповери со спанаќ и праз

Вакво нешто првпат правам. Дури не знам ни дали „поповери“ е вистинското име! Ама знам дека се многу вкусни и лесно може да се трансфромираат со различен зеленчук. Се работи за печиво слично на мафини (односно и се прави во калап за мафини), но со шуплини во внатрешноста кои се создаваат поради печењето на повисока температура и содржината на 4 јајца. Токму поради шупливата внатрешност, идеални се за полнење со некој намаз, со хумус, со ајвар или може да се трансфромираат во сендвични. Поповери со спанаќ и праз Количина: 6 поповери Време за подготовка: 30-35 минути потребен е калап за мафини Состојки: 150 g бело сенаменско брашно 70 g интегрално пченично брашно 60 g спанаќ, ситно издробен Праз 4 јајца 370 ml (1 1/2 чаша) млеко Сол Опис: Прво се мешаат двата типа брашно, па се додаваат спанаќот и празот ситно насечкани. На страна се матат јајцата, солта и млекото и се додаваат кај сувите состојки. Треба да се добие структура нешто погуста од смеса за палачинки. Се распоредува во калап за мафини и се пече во загреана рерна на 230 степени, 15 минути и уште 10 минути на 170 степени. Поповерите се вадат од рерна, се оставаат да се подизладат околу 5-10 минути и потоа се вадат од калапот. Може да се комбинираат со хумус, урда, некое друго полнење или како сендвич со тенко парче кашкавал и зелена салата.

Ќофтиња со спанаќ и мисиркино месо

Ќофтиња со спанаќ и мисиркино месо

Како родител кој постојано мора да смислува оброци за цело семејство, морам да наоѓам нешто интересно за да го обновам менито. Така, место класични ќофтиња, зошто да не испробаме ќофтиња што ќе содржат спанаќ и сирење? Искрено, до сега сум имал неколку неуспешни обиди за правење ќофтиња и потоа не сум се ни обидувал, ама со овие решив пак да се испробам и целата постапка ми е како почетник. Можеби на искусните опсиот на постапката ќе им биде премногу детален и ќе сфатат дека се работи за доста едноставен рецепт, ама на останатите ќе им биде од помош за успешно да ги состават овие ќофтиња. Ќофтиња со спанаќ и мисиркино месо Количина: околу 25 ќофтиња Време за подготовка: 20 минути потребно е поголемо тавче за пржење (слично на вог тава) Состојки: 1 чаша замрзнат спанаќ 500 g мелено мисиркино месо ½ чаша сирење (или урда) ЗАЧИНИ: лук во прав, оригано, сол и црн пипер Варен ориз Сок од лимон Маслиново масло Магдонос Мента Се комбинира со салата по желба Опис: Прво, се остава спанаќот да се одмрзне и потоа убаво се истиснува вишокот течност. Ова може да се направи и на цитна цедалка. Спанаќот се замесува со меленото мисиркино, сирењето и зачините и се формираат кофтиња. Во нелепливо тавче на малку масло и на не многу висока темепратура се пржат ќофтињата додека да покафенат на сите страни (околу 20 мин). Во текот на пржењето, ќофтињата треба постојано да се превртуваат, а може да се затворат и со капак за да кружи топлиот воздух околу нив и да не горат. Ако оваа постапка ви е комплицирана, можете да ги печете во рерна на 200 степени, околу 15 мин. Во меѓувреме се загреваат 2 чаши вода и кога ќе почнат да вријат, се додава чаша ориз убаво измиен во цедалка. Се намалува температурата и се вари оризот 10 мин. Потоа се исклучува ринглата и се остава на топло оризот со поклопен капак да го впие вишокот течност. На крај се додаваат сокот од лимон, маслото, ментата, солта и црниот пипер. Ќофтињата се сервираат со оризот и со салата по избор. Ќофтињата може да се чуваат до 3 дена на ладно и да се подгреат пред консумирање.

Пилешко со киноа и песто

Пилешко со киноа и песто

Ни сам не знам од кога не сум се обидел да составам некој посложен рецепт. Знам само дека порано уживав да изведувам чуда во кујна од што е можно посложени рецепти. Денес гледам се да е нешто побрзо и најбитно ми е да е со интересен вкус. Сакам да готвам и да препорачувам на клиенти јадења кои со секој залак нудат куп хранливи материи, а претставуваат и експлозија од вкусови. Оваа комбинација на пилешко со киноа и печен зеленчук може лесно да се трансформира, односно зеленчукот да се менува со избор на она што е во сезона. На тој начин и себеси ќе се изненадите како со сосема нов рецепт. Пилешко со киноа и песто Количина: 1 порција Време за подготовка: 20 минути потребно е тавче за пржење што не би се оштетило кога ќе се употреби и во загреана рерна Состојки: ЗАЧИНИ: италијанска мешавина, лук, сол, црн пипер, буковец ½ kg пилешко месо Тиквичка исечена на полумесечини Шери домати 2 лажици маслиново масло 2 чаши вода 1 чаша киноа Песто од босилек Опис: Во сад се мешаат зачините. Пилешкото месо се сече на парчиња и се меша со зачините, а во посебен сад се меша и зеленлукот со истите зачини. Пилешкото и зеленчукот се распоредуваат во еден ред во тавче за печење. Се печат на 200 степени околу 20-30 мин (додека да омекне зеленчукот и да се испече пилешкото). Во меѓувреме се вари киноата на средна температура, 15 тина минути со претходно зовриена вода, потоа се исклучува и со остава на топло да отстои уште 5 мин. Варената киноа се меша со потпечениот зеленук и соковите од тавчето. Се додава и пестото и се сервира со парчиња пилешко.

Фритата со спанаќ

Фритата со спанаќ

Фритатата е италијански начин на правење омлет. Најбитно е дека основата се јајца, и дека има поразличен начин на подготовка, а изборот на останатите состојки е по желба. Со промена на состојките фритата добива секогаш различен вкус (отколку кога само би испржиле матени јајца). Фритата и кој било начин на подготовка на омлет е одличен начин да се вметне зеленчук уште во појадокот, па може да се прават различни комбинации. Предолгот од овој рецепт е да се додаде листен (спанаќ или блитва) и сезонаски зеленчук (пиперка и млад кромид). Мојата фритата на сликите излезе баш како омлет, така што за да го добие автентичниот изглед или правете ја во помало тавче или направете поголема количина. Фритата со спанаќ Количина: 1 порција Време за подготовка: 20 минути потребно е тавче за пржење што не би се оштетило кога ќе се употреби и во загреана рерна Состојки: 3 јајца, матени 1 лажицa вода Сол и црн пипер ½ лажица маслиново масло Пиперка Млад кромид Млад спанаќ Лук Домат 50 g сирење Опис: На малку масло кратко се динстаат спанаќот, пиперката и младиот кромид (5 мин). Јајцата се матат со вода, сол, црн пипер и насечкан лук. За тоа време се загрева рерната на 200 степени. Откако ќе се издинста зеленчукот, се полева со јајцата, тавчето се поклопува со капак и се пржи на ниска температура да не загорат јајцата. На крај се поросува сирење и се става во рерна за да се потпече (1-2 минути). Се сервира со свеж домат и со 2 парчиња леб.

Кремаста грчка паста салата

Кремаста грчка паста салата

На многу едноставен начин познатата грчка салата може да се збогати со неколку состојки и да се добие целосен оброк. На моите профили на Инстаграм и на ТикТок голем хит беше видеото за грчка салата со наут, па сметам дека е време да составиме најнова варијанта. Во овој рецепт покрај вообичаените состојки, домат, кромид, пиперка, маслинки, фета сирење и оригано, за поголема ситост додаваме макарони и пченка, а за протеини и за кремаста структура, целата салата ја комбинираме со грчки јогурт. На крај се добива убава освежителна салата што одлично ќе се вклопи во овој период на високи температури. Кремаста грчка паста салата Количина: 2 порции Време за подготовка: 15 минути потребно е тенџере за варење на макароните и подлабок сад за салатата Состојки: 100 g макарони Домат, краставица, кромид, пиперка, насечкани 8 маслинки, насечкани 100 g фета сирење, на коцки 1 лименка (250 g) пченка 2 канчиња обезмастен грчки јогурт Магдонос, сушено оригано 1 лажица маслиново масло Сол и црн пипер Опис: Пастата се вари и се остава да се излади. Сите состојки се мешаат во подлабок сад. Ако дозволува времето, најдобро е салатата да отстои во фрижидер околу 1 час. Се сервира со малку масло и со магдонос.

Сендвич со авокадо и сирење

Сендвич со авокадо и сирење

Наједноставен начин редовно да се има брзо подготвен оброк е да се состави сендвич. Секогаш ја поддржувам идејата за сендвич со многу зеленчук во секаква варијанта, не само за подобар нутритивен профил на сендвичот, туку и за убава комбинација на вкусови и бои. Овој сенвич ги нуди вкусовите на летото, а крцкавиот зеленчук одлично се надополнува со кремастата структура на младото сирење и авокадото. Направете си повеќе и спакувајте го за да имате неколку одборци. Сендвич со авокадо и сирење Количина: 2 сендвича Време за подготовка: 15 минути потребно е тавче за динстање на спанаќот и тостер за потпекување на лебот Состојки: 4 парчиња леб 1 канче (180 g) cottage (или нискомаслена урда) 1/4 авокадо Домат, на кругови Црвен кромид, на полумсесечинки Млад спанаќ Црн пипер Опис: Лебот се потпекува на тостер. За тоа време, спанаќот кратко се динста колку да спласне. На секое лепче се мачка од сирењето и се попрскува со црн пипер. Врз сирењето се реди авокадо, парчиња домат, парчиња кромид и спанаќ. Се поклопува со уште едно лепче за да се оформи сендвич.

Палачинки од хељда

Палачинки од хељда

Палачинките ми се опсесија и редовно за викендите мора да ги имаме дома за појадок (и за ужина додека чекаме да се зготви некој друг оброк). Многу често експериментирам со различни типови палачинки и макар што кај сите составот е сличен, соодносот на состојките е тој што прави разлика. Кај палачинките најмногу сакам да експериментирам со брашната, така што најретко ги правам со обично пченично (сенаменско или интегрално) брашно. Во последно време посебно опсесија ми се палачинките од овес, наут и овие од хељино брашно. Wrap со крем сирење и пилешко Количина: 2 порции Време за подготовка: 30 минути потребни се длабок сад за мешање на состојките и нелеплива тава за пржење Состојки: 220 g брашно од хељда 300 ml обично или соино млеко (јас го користев протеинското на Алпско) 2 лажици масло 1 јајце 1/2 лажица засладувач - не е задолжително 1 лажица прашок за печиво Прстофат сол Ванила екстракт Опис: Убаво се мешаат сите состојки (освен прашокот за печиво) и смесата се остава да отстои барем половина час за да се згусне. Прашокот за печиво се додава непосредно пред пржење и убаво се промешува за да се распореди. Се зема четврт чаша од тестото и на нелеплива тава се пржат палачинките од двете страни. Се комбинираат со џем (во којот случај од јагоди и чија)

Wrap со крем сирење и пилешко

Wrap со крем сирење и пилешко

Колку и да се популарни враповите, јас некако немам обичај за мене да правам такво нешто. Ама затоа ми се наоѓа како варијанта за оброк за моите деца и мило ми е што некој дошол до идеја за ваков тип на брзи оброци. Ако сте имале пилешко во некоја комбинација и ви останала одредена количина која чека во фрижидер да биде употребена, овој врап ќе ви се најде за да го употребите. Плус пилешкото во комбинација со зеленчукот и крем сирењето со зачини дава посебен вкус кој малку отстапува од вообичаената шема за врапови. Wrap со крем сирење и пилешко Количина: 2 порции Време за подготовка: 15 минути потребни се помал сад за сирењето и поголема чинија за редење на wrap-от Состојки: 30 g крем сирење Сок од лимон Сол и црн пипер Суви зачини како копар, босилек, магдонос 2 тортиљи 100 g пилешко (издинстано) Рендан морков Краставица на ленти Зелена салата (може пакувана од маркет) Опис: Крем сирењето се меша со малку сок од лимон и зачините. Тортиљите се премачкуваат со крем сирењето и се редат: парчиња издинстано пилешко месо рендан морокв краставица зелена салата Се превиткува тортиљата како бурито.

Идеи за брзи ужини

Идеи за брзи ужини

Ако оброците не ве заситуваат или имате преголема пауза меѓу два оброка, тогаш веројатно потребна ви е некоја ужина. Ужините се мала количина на храна што се јаде меѓу главните оброци. Јадењето меѓу оброци може да биде добра навика и да доведе до подобро менаџирање на чувството на глад и ситост, но битен е изборот на храна. Подетално за тоа во кои случаи е препорачливо да се вклучат ужини во менито, а за кои не е препорачливо, прочитајте овде . Најдобро е на ужините да се гледа како на мини оброк, односно да се составени од протеини, јаглехидрати и масти. Најдобар избор на ужини се прави кога се претходно испланирани и кога фокусот е на нутритивно богата храна. Еве неколку примери за добро составени ужини. На парче леб намачкајте путер од кикирики. Наредете кругови банана и поросете со чија семе. Изблендирајте кратко младо сирење или несолена урда да нема грутки. Префрлете во сад и измешајте парчињата јаболко. Гарнирајте со мелени бадеми, малку мед и цимет. Канче грчки јогурт измешајте го со замрзнато овошје (по можност малку пододмрзнато за да пушти боја). Гарнирајте со гранола. Уште неколку идеи за ужина: Црвена пиперка со гвакамоле Ред чоколадо со неколку бадеми Краставица со хумус ( рецепт ) Домати со сирење Чија пудинг ( рецепт ) Јајце Протеински бар Пуканки со пармезан Печен наут (леблебија)

Јадењето меѓу оброци е добра навика?

Јадењето меѓу оброци е добра навика?

Дали ви се случува често да јадете меѓу оброци? За секого е различно, но се смета дека околу 20% од дневните калории ни доаѓаат од ужините меѓу главните оброци. Некои диети сосема го имаат демонизирано јадењето меѓу оброци и веројатно од таму произлегува целиот страв околу помислата дали е дозволено да имаме ужини или треба да се придржуваме само до главните оброци. Всушност, одговорот не е едноставен и препораките за секого би биле различни. Дали јадењето меѓу оброци е добра навика? Ужините или јадењето меѓу оброци не мора да се избегнува. Според истражување на Imperial College London, кога на деца им се забранува јадење меѓу оброци, може да завршат со преголема тежина. Оние кои сметаат дека не можат да го поминат денот без ужина треба да знаат дека и јадењето меѓу оброци може да биде добра навика, но клучен е изборот на храна и причината поради која се јаде. Истражување од 2006 година вели дека оние кои практикуваат ужини, имаат подобар внес на неколку клучни нутриенти, меѓу кои и на диететски влакна. Неколку помали оброци надополнети со ужина се посебно препорачливи за луѓе со предијабет или дијабет тип 2 - многу подобра опција отколку одеднаш да се изеде голем оброк. Според друго истражување , неколку помали оброци во текот на денот доведуваат до намалени нивоа на шеќерот во крвта и пониско ниво на тримесечен просечен шеќер. Ова е веројатно поради тоа што се намалува чувството на глад меѓу оброците. Каде е грешката со ужините? Најчеста грешка е јадењето од здодевност или од навика и во изборот на храната! Многу често се случува да јадеме затоа што ни е здодевно, немаме што друго да правиме, чувствуваме дека сме под стрес или навикнати сме во некои ситуации да јадеме, дури и ако не ни се јаде (пр.пуканки во кино). Проблем е и што најчеста ужина е чоколадото . Нема ништо лошо да се јаде чоколадо, меѓутоа тоа не заситува и не носи некои големи придобивки за цревните микроогранизми. Многу подобро е на ужините да се гледа како шанса да се надополни тоа што е пропуштено со главните оброци. Најдобар избор за ужина е храна со диететски влакна искомбинирана со протеини или масти. Со ваквата комбинација нема да дојде до нагло покачување на шеќерот во крвта, како во случај кога би се јадело овошје самостојно како ужина. Неколку предлози за ужини имате овде . А што ако ви се јаде чоколадо? Во тој случај изберете чоколадо со 70% какао маса и добро е да се комбинира со храна со диететски влакна - со овошка или со неколку лешници или бадеми. За кого не е препорачливо јадењето меѓу оброци? Дали постои категорија на луѓе за која не е препорачливо да јаде цел ден? Ако имате чувство дека јадењето повеќе мали оброци во текот на денот ве прави уште погладни, тогаш обидете се да имате само неколку поструктуирани оброци, затоа што ужините како мини оброк не се за вас. Ова посебно важи за оние што се склони на опстипација . Во ваков случај најдобро е придржување до најмногу 3 оброци поради т.н. миграционен моторен комплекс . Се работи за комплекс од движења кои помагаат да се истурка храната низ дигестивниот тракт. Овој процес започнува штом ќе поминат 90-ина минути без јадење. Оние што се подложни на опстипација и имаат навика постојано нешто да грицкаат, може да ги одложат ваквите контракции, односно со тоа да го намалат празнењето на цревата. Затоа, препорака е во ваков случај да не се јаде ништо меѓу оброци, односно меѓу оброците да се направат 4-5 часови пауза. Ако и тоа не помага, тогаш треба да се ескпериментира со храна со растворливи диететски влакна (пр.јаболко без лушпа, авокадо, банана, мандарини, портокали, лубеница, праски, круши, брокули, цвекло, морков, карфиол, краставица, боранија, тиква), а да се намали количината на храна во која има доминантно нерастворливи диететски влакна (пр.грав, леќа, зелка, овошје со многу лушпа, целер, марула). За крај... И покрај тоа што ужините или јадењето меѓу оброци се уште еден дел од исхраната кој трпи доста лоши критики, сепак може да биде добра навика. Најбитно е ужината да служи како премостување кој следниот оброк, односно да се избегнува јадење од досада. Треба да се внимава и на изборот на храна! Ужините најдобро е да се комбинација од протеини, јаглехидрати и масти, односно нешто како мини оброци. За оние што се подложни на опстипација, веројатно најдобро е да се придржуваат до три главни оброци, бе грицкање меѓу оброците и со пауза од 4-5 часови.

Салата во тегна со туна и наут

Салата во тегна со туна и наут

Не смеете да наоѓате оправдување ако пресконете оброк во периоди кога сте на работа или сте презафатени затоа што дури и во тие моменти може да се најде решение. А решението е да составите салата во тегла како целосен оброк! Овој рецепт е само идеја (предлог) и со количините и со составот и повеќе можете да го користите за составување ваков тип салати. Многу е битно салатата и дресингот да ги чувате одделно и да ги измешате непосредно пред конзумирање. Салата во тегла со туна и наут Количина: 1 порција Време за подготовка: 10 минути потребни се поголема тегла за салатата и помала за дресингот Состојки: Зелена салата (може пакувана од маркет) Млад лук и кромид 1 конзерва туна, процедена од маслото 300 g наут Морков, изрендан Дресинг: Лук, исечкан Масло Сок од лимон Сенф Сол и црн пипер Опис: Во тегла, на дното наредете ја зелена салата и младиот кромид, па потоа наутот, туната и морковот На страна направете дресинг од лук, масло, сок од лимон, сенф, сол и црн пипер. Пред конзумирање, истурете ја салатата во длабок сад и полејте ја со дресинг. Во случај да не сакате да носите две тегли, тогаш во големата тегла на дното истурете го дресингот и потоа редете ја, така што прво ќе го додадете наутот, па туната и на крај зеленчукот (зеленчукот да нема допир со дресингот).

bottom of page