Мерчимек (турска чорба од леќа)

Nov 14, 2020

2 min read

Пред некоја година на одмор во Турција посебен впечаток од целиот престој ми беше убавата храна. Убави турски, медитерански вкусови насекаде, комбинации на ароми и прекрасни свежи салати со специфични преливи – тоа ми е главната слика за храната што беше понудена.

Чорбата од црвена леќа, познатата мерчимек чорба беше меѓу најспецифичните турски специјалитети за кој меѓу првите побарав рецепт за да можам и дома да уживам во убавиот вкус.

Мерчимек чорбата има многу варијации на интернет, но оваа верзија е најблиску до вкусот што го почувствував во Турција.

Мерчимек (турска чорба од леќа)

Количина: 4 порции

Време за подготовка на состојките: 5 мин

Време за пржење и варење: 60 мин

Вкупно време за подготовка: 65 мин (без времето за киснење на леќата)

Се подготвува во поголемо тенџере за варење

Целосниот рецепт во PDF форма

Состојки:

1/2 голема лажица рафинирано кокосово (или маслиново) масло

1 голема главица кромид, исечкан на коцки

Половина компир или еден мал, исечен на коцки

1/2 чаша доматен сос или изблендиран домат

1 голема лажица доматно пире

Црвен пипер

1 чаша црвена леќа, претходно откисната*

Прстофат шеќер

1 мала лажица сол

Црн пипер

Мешан сув зеленчук

Сушено нане

Свеж магоднос

Тостирани семки од тиква

Опис:

Кромидот исечкан на коцки се динста на масло околу 5 минути.
Се пропржува црвениот пипер, многу кратко за да не потемни и веднаш се додава компирот. Се пропржува уште 5 минути.
Се додаваат доматниот сос и доматното пире, се пропржува уште 2-3 минути, па се додава откиснатата леќа (убаво процедена од водата во која се киснела).
Се додава прстофат шеќер, сол, црн пипер и мешан сув зеленчук и се убаво се промешува.
Се додава 1.5 L вода и се остава да се вари чорбата околу 40 минути на средна температура.
Откако ќе се свари, чорбата се пасира со рачен блендер додека да се добие мазна структура.**
Се поросува со сушено нане или свеж магдонос и со тостирани смеки од тиква.